एजेन्सी, ४ फागुन । अमेरिकी राष्ट्रपति डोनाल्ड ट्रम्पले युद्धबाट ध्वस्त भएको गाजाको पुनर्निर्माणका लागि पाँच अर्ब अमेरिकी डलर दिने घोषणा गरेका छन् ।
उनले यस क्षेत्रमा अन्तर्राष्ट्रिय बलका रूपमा हजारौँ सुरक्षाकर्मीहरू पठाउने प्रतिबद्धता समेत व्यक्त गरेका छन् । ट्रम्पका अनुसार यी प्रतिबद्धताहरूको औपचारिक घोषणा बिहीबार वासिंगटनमा हुने शान्ति बोर्डको पहिलो बैठकबाट गरिनेछ ।
ट्रम्पले सामाजिक सञ्जालमार्फत यी प्रतिबद्धताहरू सार्वजनिक गरेका हुन् । उनले भने, “शान्ति बोर्ड इतिहासकै सबैभन्दा प्रभावशाली अन्तर्राष्ट्रिय निकाय साबित हुनेछ । यसको अध्यक्षता गर्न पाउनु मेरा लागि सम्मानको कुरा हो ।”
यद्यपि, उनले पुनर्निर्माणका लागि कुन–कुन देशले रकम दिने वा सुरक्षा बलका लागि सैनिक पठाउने भन्नेबारे विस्तृत जानकारी दिएका छैनन् । तर, इन्डोनेसियाले आइतबार नै आफ्ना करिब आठ हजार सैनिक जुन अन्त्यसम्ममा गाजाको मानवीय तथा शान्ति मिसनका लागि तयार हुन सक्ने बताएका छन् ।
प्यालेस्टिनी क्षेत्रको पुनर्निर्माण निकै चुनौतीपूर्ण हुने देखिन्छ । संयुक्त राष्ट्र संघ, विश्व बैंक र युरोपेली संघको अनुमानअनुसार यस क्षेत्रको पुनर्निर्माणमा करिब ७० अर्ब अमेरिकी डलर खर्च हुनेछ । दुई वर्षभन्दा लामो समयदेखिको इजरायली बमबारीका कारण गाजा पट्टीका धेरै कम स्थान मात्र सुरक्षित छन् ।
युद्धविराम सम्झौतामा एक सशस्त्र अन्तर्राष्ट्रिय बलको व्यवस्था गरिएको छ, जसले सुरक्षा कायम राख्ने र उग्रवादी समूह हमासलाई निशस्त्रीकरण गर्नेछ । यो इजरायलको प्रमुख माग हो । हालसम्म निकै कम देशहरूले मात्र यस प्रस्तावित बलमा सहभागी हुने रुचि देखाएका छन् ।
गत १० अक्टोबरमा अमेरिकाको मध्यस्थतामा भएको युद्धविराम सम्झौता इजरायल र हमासबीचको दुई वर्ष लामो युद्ध रोक्ने प्रयास थियो । युद्धको तीव्रतामा केही कमी आए पनि इजरायली सेनाले पटक–पटक हवाई आक्रमण गरिरहेको छ । सैन्य नियन्त्रणमा रहेका क्षेत्रहरूनजिक प्यालेस्टिनीहरूमाथि गोलाबारी भइरहेको छ । वासिंगटनपोस्ट
प्रतिक्रिया दिनुहोस्