गृहमन्त्रीद्वारा पारदर्शी र नागरिकमैत्री सेवा प्रदान गर्न प्रहरीलाई निर्देशन

काठमाडौँ, १८ चैत । गृहमन्त्री सुधन गुरुङले नागरिकमैत्री, स्वच्छ, पारदर्शी र सेवामूलक प्रहरी सेवा प्रदान गर्न निर्देशन दिएका छन् ।

आज जिल्ला प्रहरी परिसर काठमाडौँको स्थलगत निरीक्षण गर्दै मन्त्री गुरुङले सम्पूर्ण प्रहरी कर्मचारीहरूलाई नागरिकमैत्री, स्वच्छ, पारदर्शी र सेवामूलक सेवा प्रदान गर्न निर्देशन दिएका हुन् ।

उनले प्रहरी सेवामा प्रविधिको प्रयोगको सन्दर्भमा सरकारले आवश्यक व्यवस्थापन गर्ने प्रतिबद्धता जनाएका परिसर प्रमुख एसएसपी रमेश थापाले जानकारी दिए । निरीक्षणका क्रममा गृहमन्त्री गुरुङले परिसरबाट भइरहेको काम कारबाही सेवा, प्रवाह र अपराध अनुसन्धानका विषयमा जानकारी लिएका थिए ।