प्रहरी जवानको हत्याको आरोपमा ४ जना पक्राउ

काठमाडौँ, ३० चैत । वीरगन्जमा एक प्रहरी जवानको हत्या भएको छ ।

मृत्यु हुनेमा जिल्ला प्रहरी कार्यालय सप्तरीमा कार्यरत प्रहरी जवान २८ वर्षीय विकास चौरसिया रहेका छन् ।

प्रहरीका अनुसार वीरगन्ज महानगरपालिका–९ मुर्लीस्थित फिरोज मियाको घरमा उनी गम्भीर घाइते अवस्थामा रहेको सूचना आइतबार साँझ ४ बजेर ४० मिनेटमा आएको थियो ।

प्रहरी टोली तत्कालै त्यहाँ पुग्दा चौरसियाको शरीरको विभिन्न भागमा धारिलो हतियारले प्रहार गरी अत्यधिक रक्तश्राव भई गम्भीर घाइते अवस्थामा फेला परेका थिए । उनलाई तत्कालै उपचारार्थ नारायणी अस्पताल लगिएकोमा  चिकित्सकले मृत घोषणा गरेका थिए ।

प्रहरीले घटनामा संलग्न रहेको आशंका तत्कालै ४ जनालाई पक्राउ गरेको छ । पक्राउ पर्नेमा रौतहटका २६ वर्षीय सन्तोष साह र उनकी पत्नी २४ वर्षीया सोनी साह छन् । त्यसैगरी बाराका १९ वर्षीय विशाल साह र भारतीय नागरिक १९ वर्षीय कन्हैया कुमार छन् । घटना के कसरी भयो भनी अनुसन्धान भईरहेको प्रहरीले जनाएको छ । पर्सा कालिकामाई गाउपालिका–१ घर भएका प्रहरी जवान चौरसिया वीरगन्जको मुर्लीमै डेरा गरी बस्थे । उनी १० दिनको बिदा लिई वीरगन्ज आएका थिए ।