काठमाडौँ, ४ असार । शिक्षा तथा खेलकुद मन्त्री सस्मित पोखरेलले बजेट कम भएकै कारण शिक्षा क्षेत्रको सुधार नरोकिने बताएका छन् ।
आज प्रतिनिधि सभाको बैठकमा आगामी आर्थिक वर्षको बजेटमाथि उठेको प्रश्नको छलफल दिँदै विद्यालय शिक्षा सुधार गर्न बजेटले मात्रै काम नगर्ने बताएका हुन् ।
उनले भने, ‘शिक्षा क्षेत्र सुधार गर्न सबै काममा बजेट आवश्यक पनि हुँदैन । बजेट विनियोजन कम भएकै कारणले शिक्षा सुधार हुँदैन भन्न मिल्दैन,’ ।
उनले शिक्षकको तालिम, तलब चालु खर्चमा जाने भएकोले पुँजीगत विनियोजन कम भएको स्पष्ट पारे । सबै माध्यमिक विद्यालय स्मार्टबोर्ड जडान गर्ने भन्दै सरकारले शिक्षामा उच्च प्राथमिकता दिएको उनले बताए ।
विद्यालय शिक्षा स्थानीय सरकारको मुख्य जिम्मेवार भएकोले स्थानीय सरकारले पनि उल्लेख्य लगानी हुनुपर्ने पोखरेलले बताएका हुन् ।
उनले सरकारले एकजना विद्यार्थीको पनि शैक्षिक अधिकार वञ्चित नगर्ने बताएका छन् । संसदमा न्यून विद्यार्थी भएको विद्यालय गाभ्न सुझाव आएको भन्दै मन्त्री पोखरलेले न्यून विद्यार्थी भएकै आधारमा विद्यालयलाई गाभेर एउटा पनि विद्यार्थीकै शैक्षिक अधिकारबाट सरकारले वञ्चित नगर्ने बताएका हुन् । सांसदहरुले भौगोलिक दुरी, विद्यार्थीको संख्याको आधारमा विद्यालय गाभ्ने, तह घटाउने लगायत विषय उठाएका थिए ।
उनले आगामी आर्थिक वर्षमा सामुदायिक विद्यालयको भौतिक सर्वेक्षण गरेर, विद्यार्थीको संख्याको आधारमा विस्तृत प्रतिवेदन तयार गरेर सोहीको आधारमा बजेटले सम्बोधन गर्ने बताए ।
प्रतिक्रिया दिनुहोस्