विदेश पठाइदिने भन्दै ठगी गर्ने चारजना पक्राउ

काठमाडौँ, २४ असार । आकर्षक वैदेशिक रोजगारीका नाममा ठगी गरेको आरोपमा प्रहरीले चारजनालाई पक्राउ गरेको छ ।

उनीहरूले विभिन्न व्यक्तिबाट २४ लाख ४५ हजार बराबरको ठगी गरेको आरोप लागेको छ । काठमाडौं उपत्यका अपराध अनुसन्धान कार्यालयले मंगलबार पक्राउ परेकालाई सार्वजनिक गरेको हो । पक्राउ पर्नेमा लमजुङका पूर्णबहादुर दुरा, दोलखाका कमला खत्री र रामकुमार श्रेष्ठ  सुर्खेतका सरस्वती गिरी छन् ।

कार्यालयका प्रवक्ता एवम् प्रहरी उपरीक्षक रामेश्वर कार्कीका अनुसार उनीहरूले युरोपका विभिन्न देश पठाइदिने भन्दै ठगी गरेको आरोप लागेको छ ।