६ जना जुवाडे पक्राउ

काठमाडौँ, १८ जेठ । उदयपुरको त्रियुगा नगरपालिका वडा नम्बर ११ पिपल चोकस्थित होटल ड्रिमलेण्डमा जुवातास खेलिरहेको अवस्थामा ६ जनालाई प्रहरीले नियन्त्रणमा लिएको छ । 

जिल्ला प्रहरी कार्यालय उदयपुरबाट खटिएको विशेष प्रहरी टोलीले होटलको तेस्रो तलाबाट उनीहरूलाई तास खेलिरहेकै अवस्थामा पक्राउ गरेको हो ।

प्रहरीले जुवाको खालबाट नगद ५७ हजार ६ सय २५ रुपैयाँ, ३ बुङ तास, ६ थान मोबाइल र ४ थान मोटरसाइकल बरामद गरेको छ । पक्राउ पर्नेहरूमा ४७ वर्षीय भलराज राई, ४५ वर्षीय चित बहादुर राई, ४६ वर्षीय बोध बहादुर थापा मगर, ३८ वर्षीय विजय राई, ३० वर्षीय संजिब बुढाथोकी र ४९ वर्षीय पुर्ण बहादुर राई रहेका छन् ।

पक्राउ परेका सबै जनालाई बरामद गरिएका सामग्रीसहित जिल्ला प्रहरी कार्यालय उदयपुरको हिरासतमा राखिएको छ । उनीहरूमाथि कानुन बमोजिम थप अनुसन्धान भइरहेको प्रहरीले जनाएको छ ।