सूर्यविनायक-८ ‘बालमैत्री स्थानीय शासनयुक्त’ घोषणा

भक्तपुर, १६ असार । सूर्यविनायक नगरपालिकाका-८ बालमैत्री स्थानीय शासनयुक्त घोषणा भएको छ ।

नगरपालिकालाई बालमैत्री स्थानीय शासनयुक्त घोषणा अभियानअन्तर्गत आज सूर्यविनायक नगरपालिका–८ लाई बालमैत्री स्थानीय शासनयुक्त घोषणा गरिएको हो । वडाध्यक्ष पुष्पराज बस्नेतको अध्यक्षतामा भएको कार्यक्रममा नगरपालिका प्रमुख बाशुदेव थापा, उपप्रमुख सरिता भट्टराई, प्रमुख प्रशासकीय अधिकृत युवराज आचार्य तथा स्थानीय जनप्रतिधिहरुको उपस्थितीमा वडालाई बालमैत्री स्थानीय शासनयुक्त घोषणा गरिएको हो । नगरप्रमुख थापाले वडालाई बालमैत्री स्थानीय शासनयुक्त वडा घोषणा गरी प्रमाणपत्र प्रदान गरेका हुन् । भक्तपुर जिल्लाका चारवटा स्थानीय तहमध्ये सूर्यविनायक नगरपालिका बालमैत्री स्थानीय शासनयुक्त घोषणा हुने पहिलो पालिका बनेको छ ।

स्थानीय सरकारले तयार पारेको बालमैत्री स्थानीय शासन कार्यान्वयन निर्देशिका, २०७८ ले तय गरेको ५१ सूचक पूरा गरेसँगै नगरपालिकाले सबै १० वडालाई बालमैत्री स्थानीय शासनयुक्त वडा घोषणा अभियान सञ्चालन गरिरहेको नगर प्रमुख थापाले बताए । असार १७ गतेसम्ममा नगरपालिकाका सबै वडालाई बालमैत्री स्थानीय शासनयुक्त वडा घोषणा अभियान पूरा हसने नगर प्रमुख थापाको भनाई थियो ।
नगर प्रमुख थापाका अनुसार, बालमैत्री स्थानीय शासनयुक्त वडा घोषणा अभियान अन्तर्गत नगरपालिकाले प्रत्येक वडामा बाल सञ्जाल गठन गरी ५१ वटा सूचक पूरा गरिसकेको छ । जिल्ला विकास समितिले सबै सूचक पुरा भएको पत्र दिएपछि नगरका सबै वडालाई बालमैत्री स्थानीय शासनयुक्त वडा घोषणा अभियान सञ्चालन गरिएको बताउँदै नगर प्रमुख थापाले बागमती प्रदेशले पुरा बुँदा पुरा भएको पत्र पठाएपछि नगरपालिकालाई बालमैत्री स्थानीय शासनयुक्त वडा घोषणा गरिने जानकारी दिए ।
सूर्यविनायक नगरपालिकाले भौतिक विकास निर्माणसंगै बृद्धबृद्धा, बालबालिकाका क्षेत्रमा लक्षित बजेटको व्यवस्था गरेको उपप्रमुख सरिता तिम्सिना भट्टराईको भनाई थियो । नगरपालिकाका सबै कार्यालय बालमैत्री र अपाङ्गतामैत्री बनाएको बताउँदै उपप्रमुख तिम्सिना भट्टराईले विपद् व्यवस्थापन योजनामा बालबालिकाको सुरक्षा र आवश्यकतालाई प्राथमिकता दिइएको जानकारी दिइन ।
तोकिएका सूचकमध्ये ९५ देखि १०० प्रतिशतसम्मको प्रगति हासिल गरेकाले सूर्यविनायकका १० वटा वडालाई औपचारिक रूपमा ‘बालमैत्री स्थानीय शासन युक्त वडा’ घोषणा गरिएको नगरपापालिकाका प्रमुख प्रशासकीय अधिकृत आचार्यले जानकारी दिए । प्रमुख आचार्यका अनुसार, सूर्यविनायक नगरपालिकाले विगत वर्षदेखि हालसम्म प्रत्येक वडालाई १० लाखका दरले एक करोड र नगरपालिकाले ७० लाख गरी कुल एक करोड ७० लाख बजेटको व्यवस्था गरी बालमैत्री स्थानीय शासनयुक्त वडा घोषणा अभियान सुरु गरेको हो ।
बालमैत्री स्थानीय शासनयुक्त घोषणा गर्नका लागि पूरा गर्नुपर्ने सूचकहरूमध्ये बालविवाह, बालश्रम, हिंसा पूर्ण रूपमा निषेधित हुनुपर्ने, सबै बालबालिकाको जन्मदर्ता, विद्यालय भर्ना र गुणस्तरीय स्वास्थ्य सेवामा पहुँच सुनिश्चित हुनुपर्ने प्रावधान सबै वडाले पूरा गरेको वडाध्यक्ष बस्नेतको भनाई थियो । वडामा बालविवाह पूर्ण रूपमा निषेध रहेको, बालश्रम हुने नगरेको, बालबालिकाविरुद्ध हुने शारीरिक, मानसिक वा यौनजन्य हिंसा र दुव्र्यवहार पूर्ण रूपमा रोकिएको उनले जानकारी दिए ।
आयोजित कार्यक्रममा बालमैत्री स्थानीय शासनयुक्त वडा घोषणा अभियानमा सहयोग पुर्याउने वडा बाल सञ्जाल नगर बाल सञ्जाल, विद्यालयहरू, स्वास्थ संस्था स्वयंसेविकालाई कदरपत्रसहित सम्मान गरिएको थियो । त्यसैगरी खानेपानी समिति, रेडक्रस, सहकारी संस्था, सांस्कृतिक समूहलाई कार्यक्रममा कदरपत्र प्रदान गरिएको थियो ।