हामी सिद्धिएको होइन, नयाँ शैलीले अघि बढ्छौँ : अध्यक्ष ओली

काठमाडौँ, १ साउन । नेकपा (एमाले)का अध्यक्ष केपी शर्मा ओलीले नयाँ शैलीबाट अघि बढ्ने बताएका छन् ।

आज पार्टीको नयाँ वेबसाइट र मोबाइल एप सार्वजनिक कार्यक्रममा उनले थुप्रै कुरामा नवीकृत भएर अघि बढ्ने बताए ।

उनले भने, “हामी नयाँ शैली र परिपार्टीले अघि बढ्छौँ । हामीले धक्का खाएको छौँ, सिद्धिएको होइन,” । उनले एमालेलाई एक्लाउने प्रयास अहिले पनि अघि बढिरहेको दाबी गरे । उनले एमाले आफ्नो स्वतन्त्र हैसियत भएको पार्टी भएको बताए । 

“हामी यस्तो लहरो होइनौँ, जसले अर्कोलाई नसमाती उठ्न सक्दैन । हामी दह्रो, मजबुत विशाल वृक्ष हौँ,” उनले भने, “हामी अरुको बलमा नभएर आफ्नै बलमा उम्रँदै, हुर्कंदै अनेक कुराको सामना गरेर आएका छौँ ।”
 उनले पार्टी पंक्तिलाई पर्याप्त प्रशिक्षण गर्न नसक्दा आफूहरूविरुद्धको हमलामा पछि परेको बताए । उनले भने, “हामीले अहिलेको समय चिनेका छौँ । तर, हामीले हाम्रो पंक्तिलाई पर्याप्त प्रशिक्षण गर्न सकेनौँ । पर्याप्त प्रशिक्षित गर्न नसकेको हुनाले आईटी जमनामा, आईटीको प्रतिस्पर्धामा, हामीविरुद्धको हमलामा पछि परेको हो । त्यसलाई मेकअप गर्ने बाटोमा हामी अघि बढ्नुपर्नेछ । अघि बढ्छौँ,”।