चार समितिको बैठक बस्दै

काठमाडौँ, १८ साउन ।  सङ्घीय संसद्का चारवटा विषयगत समितिको बैठक आज बस्दैछ ।

सङ्घीय संसद् सचिवालय अनुसार अर्थ समिति, महिला तथा सामाजिक मामिला समिति, शिक्षा, स्वास्थ्य तथा सूचना प्रविधि समिति र सार्वजनिक लेखा समितिको बैठक बस्न लागेको हो ।

बिहान ११ः०० बजे नै बस्ने महिला तथा सामाजिक मामिला समितिको बैठकमा भने साइबर सुरक्षाका विषयमा छलफल हुनेछ । शिक्षा, स्वास्थ्य तथा सूचना प्रविधि समितिको बैठक बिहान ११ः०० बजे बस्दैछ । सो बैठकमा ‘राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१’ सम्बन्धमा छलफल हुने कार्यसूची छ ।

यस्तै अपराह्न १ः०० बजे अर्थ समितिको बैठक बोलाइएको छ । उक्त बैठकमा ‘नेपाल राष्ट्र बैंक ऐन, २०५८ लाई संशोधन गर्न बनेको विधेयक’माथि दफावार छलफल जारी रहनेछ । अपराह्न २ः०० बजे बस्ने लेखा समितिको बैठकमा भने समितिमा परेका उजुरीमाथि छलफल गर्ने कार्यक्रम रहेको छ ।