सरकारले देशको लागि अत्यन्त घातक कार्य गर्दैछ : नेता रावल

काठमाडौँ, ४ असार । नेपाली कम्युनिस्ट पार्टी (नेकपा)का नेता डा. भीम रावलले दक्षता र अनुभव हासिल गरेको जनशक्तिलाई हटाएर राज्यलाई कमजोर बनाउने खेल भइरहेको आरोप लगाएका छन् । 

रास्वपाको झन्डै दुई तिहाइ बहुमतको सरकारले सहसचिवभन्दा माथिका एवं लामो समय प्रशासनिक सेवा गरेका १० हजार बढी कर्मचारीलाई अवकाश दिन लागेको भन्दै रावलले असन्तुष्टि जनाएका हुन् । 

सामाजिक सञ्जालमा उनले भनेका छन्, ‘रास्वपाको झन्डै दुई तिहाइको सरकारले सहसचिवभन्दा माथिका एवं लामो समय प्रशासनिक सेवा गरेका १० हजार बढी कर्मचारीलाई अवकाश दिने कुरा चर्चामा आएको छ। नेपालको इतिहास हेर्दा २००७ सालको परिवर्तनपछि बाह्य शक्तिको इशारामा तत्कालीन प्रधानमन्त्री मातृकाप्रसाद कोइरालाले ठूलो संख्यामा सेनाको कटौती गरेर दक्षिण एसियामा शक्तिशाली रहेको नेपाललाई कमजोर बनाए। २०४६/४७ सालको आन्दोलनपछि बहुमत प्राप्त नेपाली कांग्रेसको सरकारका प्रधानमन्त्री गिरिजाप्रसाद कोइरालाले एकातिर प्रतिजासुसी संगठन खारेज गरी राष्ट्रको सुरक्षा प्रणाली कमजोर तुल्याए भने अर्कोतिर राज्यले धेरै ठूलो लगानी गरेर उत्पादन गरेको जनशक्तिलाई ठूलो सङ्ख्यामा हटाई प्रशासनयन्त्रलाई कमजोर बनाए।अहिले फेरि राज्यको धेरै ठूलो लगानी भएको र लामो समय प्रशासनयन्त्रमा रहेर दक्षता र अनुभव हासिल गरेको जनशक्तिलाई हटाएर राज्यलाई कमजोर बनाउने खेल खेलिँदैछ । पुराना राजनीतिक दल सत्तामा रहेको बेलाका कर्मचारी भन्ने बहानामा लोकसेवा आयोगको परीक्षा र प्रशासनिक प्रक्रियाबाट छानिएका र अनेकौं तालिम र अनुभव हासिल गरेका कर्मचारीहरुलाई निष्कासन गर्ने भनेको नेपाल जस्तो आर्थिक कठिनाइ र अनेक प्रकारका समस्याहरुले ग्रस्त देशको लागि अत्यन्त घातक कुरा हो । यस्तो संवेदनशील विषयमा राजनीतिक दलका नेताहरु, सांसद, स्वयं कर्मचारीहरु र नागरिकहरूको गम्भीर रुपमा ध्यान जानुपर्छ । नेपाल २००७ सालपछिको परिवर्तनका अनेक चरणहरूमा यस्ता प्रकारका षड्यन्त्रहरू र प्रयोगबाट आक्रान्त हुँदै आएको छ। यस्तो स्थितिबाट देशलाई जोगाउनु पर्छ । चेतना भया ।’