केपी ओलीको नाम शिलालेखबाट मेटिएला तर इतिहास मेटिँदैन : महासचिव पोखरेल

काठमाडौँ, १० साउन । नेकपा (एमाले)का महासचिव शंकर पोखरेलले विकास र समृद्धिको नेतृत्वमा एमाले र एमालेका अध्यक्ष केपी शर्मा ओलीको नाम शिलालेखबाट मेटाइएता पनि इतिहास भने कहिल्यै नमेटिने बताउनुभएको छ ।

नागढुंगा सुरुङ मार्गको तत्कालिन प्रधानमन्त्री केपी शर्मा ओलीले गर्नुभएको शिलान्यासको शिलालेख उद्घाटनको तयारीमा रहेको समयमा सरकारले हटाएपछि आक्रोस व्यक्त गर्दै महासचिव पोखरेलले उक्त कार्य सरकारको पूर्वाग्रह र प्रतिशोधपूर्ण भएको टिप्पणी गर्नुभयो ।

उहाँले आफ्नो सामाजिक सञ्जालमा भन्नुभएको छ, ‘सुरुङमार्गको शिलान्यास शिलालेखबाट केपी ओलीको नाम हटाइनु सरकारको निकृष्ट पूर्वाग्रह र प्रतिशोधको राजनीति हो । जननेता मदन भण्डारीको ‘प्रतिशोध र पूर्वाग्रह प्रजातान्त्रिक गुण होइनन् ।’ भन्ने सत्य बचनलाई वर्तमान सरकारले मनन गर्न सकेको देखिएन । वास्तवमा बालेन नेतृत्वको सरकारले इतिहास र लोकतान्त्रिक मूल्य बिर्सेर जुन हर्कत गरिरहेको छ, यसले उनीहरूलाई नै दुर्भाग्यपूर्ण पतनतर्फ धकेल्नेछ !’