महँगो भएकाले नेपालले धेरै फरेन्सिक ल्याब बनाउन सक्दैन : सांसद पुन

काठमाडौँ, २१ जेठ । प्रतिनिधिसभा सदस्य एवं राष्ट्रिय आविष्कार केन्द्रका संस्थापक महावीर पुनले ठुलो लगानी लाग्ने र अत्यन्तै महँगो हुने भएकाले नेपालले धेरै सङ्ख्यामा फरेन्सिक ल्याब (विधि विज्ञान प्रयोगशाला) बनाउन नसक्ने बताएका छन् ।

आज सङ्घीय संसद् प्रतिनिधि सभा अन्तर्गतको शिक्षा, स्वास्थ्य तथा सूचना प्रविधि समितिको बैठकमा ‘राष्ट्रिय विधि विज्ञान प्रयोगशाला विधेयक’ माथिको छलफलमा भाग लिँदै उनले प्रयोगशालाका लागि आवश्यक पर्ने उपकरणहरू धेरै महँगो हुने भएकाले प्रदेश प्रदेशमा ल्याब राख्ने कुरा नेपालको आर्थिक क्षमताले नभ्याउने स्पष्ट पारे। फरेन्सिक ल्याबले अन्तर्राष्ट्रिय स्तरको आईएसओ मान्यता प्राप्त गर्नुपर्ने र त्यसका लागि ठुलो साधन स्रोत चाहिने उनको भनाइ थियो।

छलफलका क्रममा अन्य सांसदहरूले प्रत्येक प्रदेशमा फरेन्सिक ल्याबहरू स्थापना गर्नुपर्ने आवश्यकता औँल्याएपछि पूर्वशिक्षामन्त्री समेत रहेका सांसद पुनले भने, ‘एकदम राम्रो प्रविधियुक्त र आधुनिक साना–साना कार्यालय प्रदेश प्रदेशमा खोलेर काम गर्ने कुरा त आयो। नेपालमा हजारौँ केसहरूमध्ये ५-१० वटा केस आत्महत्या वा अन्य यस्ता जटिल खालका आउलान्, जसको फरेन्सिक जाँच गर्नुपर्ने हुन्छ। त्यसैले यसलाई आवश्यकता अनुसार प्रदेशमा खोल्नुपर्छ त भनियो, तर यस्ता प्रयोगशालाका लागि आईएसओ प्रमाणपत्र लिने भन्ने कुरा ज्यादै महँगो विषय हो। आईएसओ त्यत्तिकै पाइँदैन, त्यसका लागि आवश्यक मात्रामा उपकरणहरू हुनुपर्छ। ती उपकरणहरू यति महँगो हुन्छन् कि तिनको व्यवस्था नभई आईएसओ मिल्दैन। आईएसओ भएन भने विदेशमा यहाँको जाँचको मान्यता हुँदैन। त्यसैले धेरै ठाउँमा खोल्नुभन्दा एउटा मात्र खोलौँ र त्यसैलाई सकेसम्म आधुनिक बनाऔँ।’