कार्की आयोगको प्रतिवेदन कार्यान्वयन गर्ने जिम्मा रास्वपाको काँधमा: बाबुराम भट्टराई

काठमाडौँ, १२ चैत । पूर्व प्रधानमन्त्री डा. बाबुराम भट्टराईले भदौ २३ र २४ गतेको घटना छानबिनका लागि गठित गौरी बहादुर कार्की आयोगको प्रतिवेदन अनुसार दोषीलाई कारबाही, राम्रो काम गर्नेलाई पुरस्कार र शासकीय सुधारका लागि विस्तृत सिफारिसहरू गरेको जानकारी दिँदै अबको जिम्मेवारी नयाँ बन्ने रास्वपा सरकारको काँधमा आएको बताएका छन् ।

सामाजिक सञ्जालमार्फत प्रतिक्रिया दिँदै डा. भट्टराईले भदौ २३ र २४ गतेको घटना छानबिनका लागि गठित गौरी बहादुर कार्की आयोगको प्रतिवेदन सार्वजनिक हुनुलाई सकारात्मक कदम भनेका छन् । 

उनले भनेका छन, ‘भदौ २३ र २४ गतेको घटनाको छानवीन गर्न बनेको गौरी ब. कार्की आयोगको रिपोर्ट (९०७ पेज, यहाँ संलग्न छन्, अवश्य हेरौं!) सुशीला कार्की सरकारले अन्तिम समयमा भए पनि जारी गर्नु सकारात्मक छ।

प्रतिवेदन सरसर्ती पढ्दा लागेका प्रारम्भिक अनुभूति:

• दुबै दिनका अपेक्षा गरिए अनुरुपकै घटना विवरण छन् !

• २३ गते तत्कालीन सरकारमा रहेकाहरूको गम्भीर गल्ती देखिन्छ! TOB समूहले आन्दोलन भड्काउन नियोजित भूमिका खेलेको देखिन्छ ।

• २४ गते राज्यका सबै अंगहरू कोल्याप्स भएको प्रष्ट बुझ्न सकिन्छ । त्यसमा मुख्यतः Youth Against Corruption, Yuwa Hub , Hami Nepal ले २२ गतेदेखि नै Discord service मार्फत् तयारी गरेको विस्तृत विवरण प्रतिवेदनमा उल्लेख छ।यसमा विशेषतः Sudan Gurung को भूमिकालाई प्रतिवेदनले महत्वसाथ उल्लेख गरेको छ ।

• कार्वाही, पुरस्कार र शासकीय सुधारका सिफारिसहरू विस्तृत रूपमा दिइएका छन् ।

देश र जनताको हितमा यो प्रतिवेदनलाई गम्भीरतापूर्वक लिएर कार्यान्वयन गर्ने र नयाँ इतिहास रच्ने कि पुरानै दुःखद इतिहास दोहोर्याउने अब बन्ने रास्वपा सरकारको हातमा छ !’