नेपाल अब यथास्थितिमा बस्न तयार छैन : मन्त्री गौतम

काठमाडौँ, २२ चैत । कानुन, न्याय तथा संसदीय मामिलामन्त्री सोविता गौतमले नेपाल अब यथास्थितिमा बस्न तयार नभएको बताएकी छन् ।

आजको संसद् बैठकमा डोलप्रसाद अर्याललाई सभामुख पदमा निर्वाचित गरियोस् भन्ने प्रस्तावमा समर्थन गर्दै गौतमले २०८२ को निर्वाचनले संसद्को स्वरुप मात्रै होइन देशको मनोविज्ञान नै बदलिएको बताएकी छन् । संसदमा नेपालका कठिन भूगोलको पीडा पनि प्रतिविम्बित भएको भन्दै उनले यहीँ उज्यालो भविष्यको आशा पनि देखिरहेको बताइन् ।

उनले भनिन्, ‘संसद्‌मा यसपटक धेरै नयाँ अनुहार आएको भन्दै उनले थपिन्, नेपाल अब यथास्थितिमा बस्न तयार छैन । तदर्थवादको चक्रमा अल्झिरहन चाहन्न । यस संसद्मा सम्भावना पनि छन् । सांसदहरु पदभन्दा बढी प्रतिज्ञा लिएर आएका छन् । यो संसद पक्ष र विपक्षको सीमाभन्दा माथि उठ्नैपर्छ । सबै मिलेर संसद् परिपक्व बनाउनुपर्छ । स्वस्थ बहस आवश्यक छ । सभामुखले यसका लागि सहजीकरण गर्ने अपेक्षा गरेकी छु ।’